Ze Strjažowa/Striesow. Prědny pětk w januarje su se w strjažojskej kjarcmje zmakali, aby woplěwali nałog woklapnice. Gmejnski zastupnik Matthias Zempel jo pówitał swójich sobubergarjow w serbskej rěcy a jo žycył strowe nowe lěto. Pó wopomnjeńskej minuśe za zemrětych Strjažowarjow zachadnego lěta jo wón pśepódał słowo šołśe Fredoju Kaiseroju. Kaž na kuždej woklapnicy jo pódał na zachopjeńku pór licbow a faktow. Tak su pśibytne zgónili wó dwěma narodoma w slědnem lěśe, wó tuchylu 24 źěłaŕstwo wugbajucych zawodach a 358 wobydlarjach w Strjažowje.