Co wzejośo sebje prědk za lěto 2024? Na co se wósebnje wjaseliśo w nowem lěśe? A ewentualnje: Co by Wy w serbskem swěśe hyšći raźi měli, což Wam how dotychměst felujo? Toś te pšašanja jo Nowy Casnik na proze k nowemu lětoju wšakim luźam ze serbskego swěta stajił. Wutšobnje se źěkujomy za wšykne wótegrona!
Julia Běrinkowa z Drjejc: Wěcej we momenśe žywa byś, take cele wósebne momenty w žywjenju tak pšawje póžywaś móc – to sebje prědk wzejom za nowe lěto. To mam za wažne pśedewšym glědajucy na mójeju synowu. Naš gromadny cas jo tak drogotny, a ten njedejał byś skazony pśez to, až mam pśewjele organizatoriskego na mysli. Rědne gromadne dožywjenja z góleśoma, z familiju, su teke to, na což se 2024 nejwěcej wjaselim.
W serbskem swěśe by my pópšawem kradu trjebali něco ako serbski Netflix – jaden „Serbfliks“, na to mě jo Madlena Norbergowa pśišła. Wó takem smy my se raz w jadnej runźe w Rěcnem centrumje WITAJ rozganjali.