Z Města/Cottbus. Tšochu rědnjej to něnt wuglěda blisko wjelikeje Blechenoweje kupnice. Źěl teje njerěšneje „brachy“ ga su w slědnych mjasecach wurěšyli a do rěcha spórali. „Zelene“ flaki tam su a natwarili su teke pisany drjewjany domcyk, źož mógu źiśi graś. Teke ta droga mjazy Blechenowym karejom a Měsćańskeju halu jo něnto šyrša, tak ako jo něnto dosć městna za kólasowarjow a za pěškarjow.
Luźe se pak něnto pšašaju, co buźo se na tom wjelikem flaku wesrjejź města staś. To jadno jo jasne, až tam njebuźo dalšna wjelika kupnica. Taku Město wěcej njetrjeba. Južo jo dosć idejow, planow, naraźenjow a wěsće teke cowanjow, co dej se tam staś a twariś. Rozsuźiś dej to na kóńcu wósebna komisija z 38 cłonkami, ako su něnt załožyli. Do njeje słušaju zastupniki wšych partajow w měsćańskej zgromaźinje a měsćańskego zastojnstwa, architekty a druge. K tomu dej pśiś hyšći wósym „normalnych“ wobydlarjow z Města – styri žeńske a styrjo muske. Chtož jo kśěł, jo se mógał pśipowěźeś, a z teje wěsće wětšeje licby se pón tych wósym wobydlaŕkow a wobydlarjow ten tyźeń wulosujo. (Snaź jo teke jaden serbski pódla?)