Z Města/Cottbus. Krotko pśed gódami běšo zastojnske sudnistwo w Chóśebuzu se zaběrało ze dalšnymi skjaržbami, ako běchu zapódali wšake gmejny w Dolnej Łužycy dla serbskego sedleńskego ruma. 14. decembra su jadnali dla gmejny Dolina Nyse a Małske (Neiße Malxetal), a pśi tom jo šło głownje wó Wjeliki a Mały Kólsk (Groß- und Klein Kólzig). (Nowy Casnik jo w slědnem numerje wó tom pisał.) Tyźeń pózdźej – 20. decembra – su se pśewjadli ned styri sudniske jadnanja, a za to su trjebali jano wokoło pěś góźinow.