Z Gołkojc/Kolkwitz. Wobšyrne twaŕske źěła za nowu cełkownu šulu blisko Gołkojc běže pó planje. Tak mógu ju dnja 31. awgusta togo lěta oficialnje wótwóriś. Južo wót apryla pak změju tam prědne rědownje swóju wucbu.

Wó jadnej wěcy pak se južo dlejšy cas diskutěrujo a wobradujo. Wokrejsne zastojnstwo w Baršću ga jo naraźiło, až se ta pjerwjejšna zeleznicowa stacija w Hajnku/Hänchen (jo to jadna z tych 18 jsow, ako słušaju z lěta 1993 do gmejny Gołkojc) zasej reaktiwěrujo a wótwórijo. Tamkor by mógali pón zasej wuknice a wukniki mjazy drugim z Drjowka abo z Města ze śěgom jěś a wót dwórnišća až k nowej šuli zewšym daloko njejo. Zagronite wót zeleznice pak su se dotychměst bóžko pśeśiwo tomu stajili. Togodla jo wokrejsne zastojnstwo wót SPN něnto jadnomu inženjerskemu běrowoju dało nadawk, pśepytowaś a gódnośiś, lěc take nowe dwórnišćo wužytne jo abo nic. Na kóńcu togo lěta dej to byś wótzamknjone, a pón kśě wótnowotki stupiś do diskusije ze zagronitym ministaŕstwom w Pódstupimje.