14 mio euro felujo 2024

Z Baršća/Forst. We wokrejsu Sprjewja-Nysa (SPN) jo něnto jasne, z wjele pjenjez mógu w lěśe 2024 góspodariś. To su cłonki wokrejsnego sejma na swójom lětosnem slědnem pósejźenju w Baršću diskutěrowali a pón teke wobzamknuli. Etat za lěto 2024 pśedwiźi, až kśě znowa wudaś 378 milionow euro, nabraś pak budu nejskerjej jano 364 euro. Z tym felujo we wokrejsnej kasy wokoło 14 milionow euro, a to kśě wurownaś z nowym kreditom wót 10 milionow euro. Mjazy drugim dej wokrejs wó wjele wěcej pjenjez wudaś za to, až dostanu młoge wuše tarify.

Bóžko jo tšochu wuša suma tych pjenjez, ako deje komuny daś do wokrejsnego etata (Kreisumlage). Pó dlejšej diskusiji su cłonki wokrejsnego sejma za to głosowali, až wucynijo to znowa 42,5 %, to groni wěcej ako w lěśe 2023. Protesty z komunow njejsu mógali tomu zadoraś. Groniło jo se k tomu, až pśiźo pśez tu „Kreisumlage“ něźi 70 milionow euro do wokrejsneje „kase“. Wót nich pśiźo wokoło 25 % zasej na wšaki part slědk do komunow.