Z Gołkojc/Kolkwitz. W pódpołdnju Gołkojc, na Kóšnojskej droze (Koschendorfer Sraße) 35, namakajo se pśirodny a wobswětowy centrum „Stara gólnica Gołkojce“, źož pśepšosyjo „NABU pśirodošćitne towaristwo wjelika gmejna Gołkojce“ pśez cełe lěto na kubłańske a schadowańske pórucenja. Dobru tradiciju teke ma, až wóttud se wupóraju 1. januara na nowolětne wandrowanje. Lětosa jo se to stało k 19. razoju, jo pśeraźiła Karla Fröhlichowa wót pśirodošćitnego towaristwa. Wokoło 40 luźi jo wóna tenraz pówitała. Wjeźenje wandrowanja jo zasej měł něgajšny gólnik Achim Nugel na starosći. Něźi jadnu góźinu su pó wokolnej góli, teke pó góli towaristwa, ducy byli. Achim Nugel jo informěrował wó wjelikich wupominanjach pśi pśetwari chójcoweje góli do listoweje góle. Glědajucy na změnu klimy su změny w góli drje zmysłapołne, ale – tak jo Achim Nugel pódšmarnuł – razka eksperty njamógu z wěstosću groniś, co buźo how w 100 lětach derje rosć. Njegrajo jano temperatura rolu, ale teke cestosć spadkow a tudska pěskowata zemja. Na wobgroźonej pśestrěni su how duby sajźili.