„To jo był wjelicny swěźeń!“, dopomnjejo se Hella Stoleccyc na burstak Kolektiwa wakuuma, kenž su lětosa w juliju w Žylowje z pisanym programom a z wjele pśijaśelami a pśijaśelkami kolektiwa swěśili. Pśed dwěma lětoma ga jo była Hella Stoleccyc jadna tych sedym załožeńskich cłonkow wónego kolektiwa, kenž se stara z wjelebocnymi aktiwitami a nabejneju tšochu kreatiwity wó wěcej městna za serbsku kulturu a subkulturu, na taki part wupołnjujucy „wakuum“ wesrjejź serbskego swěta. Swěźeń drugego lěta wobstaśa jo jaden tych lětosnych wjeraškow togo koła był – nic pak jadnučki. Comy se raz do rewije daś! A pón nas teke wjelgin zajmuju jich plany za pśiduce lěto.