Z Huštanja/Wüstenhain. Drugu njeźelu pśichoda, 10. decembra, stej wugótowałej wósada Grabicański jazor (Gräbendorfer See) cerkwinego wokrejsa Dolna Łužyca, region Zły Komorow, a Kupka serbska namša w Huštanju (Wüstenhain) namšu. Była jo to druga taka namša a pśichwatało jo na nju 43 namšaŕkow a namšarjow. Namšu sobu wugótowali su młode luźe Pauline, Annelie, Wanda a Kito, kenž su pśednjasli tšojenje wó swětej Babušy, žeńskej, kenž jo se pśeśiwo wóli nana dała dupiś a za kótaruž jo wišnjowa gałuzka w popajźeństwje była znamje naźeje a sćerpnosći. Karina Raddacowa, wósadna a cłonk Serbskeje pśirady EKBO jo naraźiła graś toś tu scenu. Pśestajiła a z gymnaziast(k)ami w serbskej rěcy nazwucowała jo ju Christiana Piniekowa. Młode luźe su teke dwójorěcne zapšosby pśednjasli. Ku kóńcnemu spiwanju kjarliža w serbskej rěcy „Kužde lěto dajo“ jo se jim hyšći pśidružył Erik, kenž jo tež wuknik Dolnoserbskego gymnaziuma. Ewangelium w serbskej rěcy jo cytał Hanzo Wilhelm-Keł z tudskeje wósady.