Z Města/Cottbus. Do gmejny Dolina Nyse a Małske/ Neiße-Malxetal we wokrejsu Sprjewja-Nysa słuša dogromady pěś wejsnych źělow: Wjeliki Kólsk/ Groß Kölzig, Jarješk/ Jerischke, Kósmejce/Jocksdorf, Mały Kólsk/ Klein Kölzig a Rjašćany/ Preschen. Dwa z nich – Wjeliki Kólsk a Mały Kólsk – stej stojałej dotychměst na lisćinje bramborskego serbskego sedleńskego ruma. Gmejna pak jo pśeśiwo tomu skjaržyła a z teju skjaržbu jo se zastojnske sudnistwo Chóśebuz slědny tyźeń stwórtk, 14. decembra, zaběrało. To nowe pśi tom jo było to, až tenraz jano jaden sudnik – Phillip Görich – jo to cełe jadnanje wjadł. Ako jo wón Casnikoju gronił, buźo to teke tak pśi pśiducych „procesach“.