Z Brjazyny/Briesen. Dnja 15. nowembra su pśišli někotare Witaj- a serbske źiśi nerwoznjejše ako howac do Brjazyńskeje zakładneje šule „Mato Kosyk“. Na tom dnju jo se wótměło kuždolětne serbske cytańske wuběźowanje za rědownje 3-6. Z kuždeje tych rědownjow su se te nejlěpše cytarje na wuběźowanje delegěrowali. Pśed jury su wóni musali serbski se pśedstajiś, znaty a njeznaty tekst cytaś.
W jury su sejźeli Katrin Šwelina wót Domowniskego muzeja Dešno, redaktorka casopisa „Płomje“ Katarzyna Fidekowa , kněni Wiesnerowa wót horta „Styri lětne case“ Brjazyna a Diana Buchanowa – ceptaŕka zakładneje šule Brjazyna.
Cytańske wugbaśa źiśi su cłonkam jury śěžki rozsud napórali. Tak su wótergi mócnje diskutěrowali, nježli ten nejlěpšy abo ta nejlěpša jo wěsty był abo wěsta była. W lětniku 4 stej musałej dwě góleśi samo hyšći raz pśed jury stupiś a dalšny raz cytaś. Pón jo to skóńcnje tak daloko było a cesćenje dobyśarja jo mógło se zachopiś.