Z Rogowa/Horno. Zawěsće se hyšći wjele luźi dopomnjejo na wójowanje a woboranje jsy Rogow pśeśiwo wótbagrowanju. Pomogało bóžko njejo nic, lěcrownož běšo nowe kněžaŕstwo pó pśewrośenju zlubiło, až žedna wjas njedej se wěcej brunicy woprowaś. A tak jo w lěśe 2003 ten tužny cas pśišeł, až su musali Rogowarje swóju lubowanu wjas wopušćiś. Su se pśesedlili do Nowego Rogowa, noweje jsy, ako jo se pśez Vattenfall natwariła. A na toś to pśesedlenje pśed 20 lětami jo spomnjeńska namša 19. nowembra w rědnej rogojskej cerkwi kśěła pokazaś a spomnjeś. Jo to teke zwězane było z 20lětnym jubilejom rogojskeje cerkwje sameje, dokulaž w septembrje 2003 jo było wótewześe cerkwineje hawby w starem Rogowje a na drugem gódownem swěźenju samskego lěta jo se prědny raz swěśiła namša w nowej cerkwi w Nowem Rogowje. Namša jo kśěła toś tomu casoju, w kótaremž jo se tak wjele stało a wjele změniło, wótpowědny a dostojny rum daś a tužycu, bólosći a rozžognowanje rowno tak wugroniś ako dowěru a naźeju.