Z Turnowa/Turnow. Wušej 40 młoźinskich šefow a šefowkow jo slědowało pśepšosenju Tobiasa Ungera do Turnowa, aby se wobźělili na slědnem młoźinskem aktiwje togo lěta. Take slědne zarědowanje kóńc lěta jo kšuśe etablěrowane, wótměło jo se kóńc nowembra.

Tobias Unger jo zespominał aktiwity togo lěta a jo chwalił wažne źěło, kótarež te jadnotliwe młoźinske kupki wugbaju. Z woplěwanim serbskich nałogow pśinosuju k zdźaržanju žyweje serbskeje kultury. Wušej togo jo se wuźěkował za wobźělenje w bogatej licbje, lěc pśi zmakanjach młoźinskego aktiwa, pśi pśigótowanjach k Superkokotoju abo pśi volleyballowem a kopańcowem turněrje.