Z Gołbina/Gulben. Chtož jo pšawidłowny gósć zapusta a kjarmuše w Gołbinje, ten jo teke tudsku młoźinu dožywił. Něźi wót lěta 2016 jo se how jadna młoźinska kupka nowo zestupała. Leni Šymjeńcojc (Schiemenz), Jenny Steinlandojc, Heinrich Klunkert a Alina Bzdakojc twórje aktualne wjednistwo teje kupki. „W pśedsedaŕstwje stej pśecej dwa młodšej a dwa wěcej nazgónitej cłonka młoźiny. Profitěrujomy wót nazgónjenjow staršych a wót fryšnego inputa młodšych“, groni Heinrich Klunkert. Skóro kužde druge lěto se młoźinske pśedsedaŕstwo nowo wuzwólujo. Tuchylu ma gołbinska młoźina 25 aktiwnych cłonkow, kótarež pśez cełe lěto wejsańske zarědowanja sobu wugótuju.