Basni za źiśi dejali byś pśepšosenje, se na grajucy a rozwjaselecy part z rěcu zaběraś. A dolnoserbske źiśece basni, ako se za to derje góźe, se namakaju na pśikład w zběrce „Šwice ptaški – šwicym ja“ Eriki Jahnoweje (1932–2022) z Dešna. Mjazy tymi 65 basnjami su někotare krotše a někotare dlejše, teke młoge pśebasnjenja z górnoserbšćiny (na pśikład wót Jana Radyserba-Wjele) a na kóńcu kniglickow dajo hyšći pěś luštnych rymowanych graśow za źiśi.

Z perfektnym rytmusom a z dobrym zacuśim za źiśecu perspektiwu prezentěruju se wóne basni a gronka. We nich se rozwija źiśecy swět z grajkami, zwěrjetami a wósebnymi „góźbami“, ako su to start do šule, ptaškowa swajźba, camprowanje, jatšy abo gódy.