Z Města/Cottbus. Wukniki a wuknice stwórteje a šesteje rědownje kaž teke jich starjejše stoje pśed wažnym rozsuźenim, gaž to źo wó dalejwjeźecu šulu. „Pódla fachoweje wusměrjonosći su teke atmosfera, wokolina wuknjenja a zeznaśe z wucecymi wažne za to rozsuźenje. Wšo comy zmóžniś ku dnju wótwórjonych źuri, a to pětk, 1. decembra 2023“, tak pśipowěźejo wjednik Dolnoserbskego gymnaziuma dr. Matthias Guttke.
Wótwóriju źurja šule wót zeger 16:00 do 19:00, aby wukniki mógli dostaś pśeglěd wó póbitowanjach šule. „Comy pokazaś, až jo Dolnoserbski gymnazium něco cele wósebnego. Smy šula, kótaraž serbske tradicije woplěwa – wšykne wuknice a wukniki se tam aktiwnje zapśimjeju. Wuknice 12. lětnika budu woglědarjow w serbskej drastwje póstrowiś“, groni Guttke.
Planowane su teke lětosa wjeźenja pśez někotare fachowe rumy a kabinety gymnaziuma. Ceptarje a wukniki su pśigótowali zapśimujuce eksperimenty a doglědy do šulskego žywjenja a budu stojaś za pšašanja a rozgrona k dispoziciji.