Z Drjowka/Drebkau. Woblubowana tema, aby wuknikam a wuknicam zakładneje šule to serbske zbližyś, su serbske powěsći. Wjele zajmnego ga móžo se wulicowaś wó wódnem mužu, pśezpołdnicy, błudnikach a lutkach. A naše powěsći graju cesto na znatych městnach w našom regionje, maju wuski zwisk z łužyskeju domownju. Ale lěpjej ako figury jano ku woglědanju su figury, z kótarymiž mógu źiśi se teke do interakcije daś. Tak jo se mysliło Spěchowańske towaristwo muzeja Serbskeje tkajaŕskeje śpě Drjowk a jo dał narucne pupki powěsćowych figurow zgótowaś. Zmóžniło jo to spěchowanje pśez Ministaŕstwo za wědomnosć, slěźenje a kulturu Bramborskeje. Teke Žarjabnica Sprjewja-Nysa (Sparkasse Spree-Neiße) jo to pódpěrała.