Z Rogowa/Horno. Pśed krotkim su w Rogowje spominali na tužny a njerědny cas we swójej rědnej nimsko-serbskej jsy. W lěśe 2003 – to groni rowno pśed 20 lětami – jo wětšy źěl wobydlaŕstwa musał swóju domownju wopušćiś. Bramborske kněžaŕstwo ga běšo 1993 wobzamknuło, až dej tam pśiś wuglowa jama, za tym až běšo ministaŕski prezident Manfred Stolpe (SPD) pó lěśe 1990 zlubił, až móžo Rogow wóstaś.

Wokoło 60 familijow z wušej 300 paršonami jo 2003 pśeśěgnuło do „Nowego“ Rogowa blisko Baršća. Te slědne su pón 2004 swóju domownju wopušćili, za tym až běchu wót lěta 2002 stajili w „Nowem“ Rogowje nowe domy.