Serbska drastwa jo wšuźi rědna – wšojadno, lěc w Dolnej abo Górnej Łužycy. Wósebnje drogotna a pisana pak jo wóna w slěpjańskej wósaźe – mjazy drugim z tymi kšasnymi šnorkami a z tymi mócnymi cerwjenymi a zelenymi barwami.

To wšykno se wósebnje mócnje a widobnje pokažo w tej drastwje, z kótarejuž tam woblekaju w pśedgódownem casu to znate „dźěćetko“. Frauke Rahrojc, ako jo se w Chóśebuzu naroźiła a něnto w Halle bydli a tam ako twórjeca wuměłcowka źěła, jo w lěśe 2022 w tych sedym jsach kołowokoło Slěpego z kameru zapópadnuła toś ten wósebny serbski a kśesćijański nałog. Njejo to był prědny raz, až jo wóna filmowała to serbske žywjenje w tamnych stronach, juž cesćej jo „wjerśeła“ wósebnje w Rownem.