Jo južo dobra tradicija, až se w rěźe „Heimat/Domownja/Domizna“ pokažu na filmowem festiwalu teke filmy wó drugej narodnej mjeńšynje, wó dalšnej etniskej kupce w Europje. Tych ga jo bejnje wjele – wót tych něźi 700 milionow luźi w cełej Europje ga pśisłuša kuždy sedymy k jadnej takej mjeńšynje.
Tenraz jo se dostał do Chóśebuza film z Norwegskeje. Tam a we Finskej, Rusojskej a Šwedojskej ga bydle Samy (Sápmi). Jich jo dogromady wokoło 70.000 a jich zgromadne zajmy zastupujo mjazy drugim „Samiska rada“ (Sámiráddi) z 15 cłonkami.