Qaqortoq jo nejwětše městaško na pódpołdnju Grönlandskeje. Lažy na pódpołdnjowej špicy połkupy a ma něźi 3.100 wobydlarjow. Z tym jo na pětem městnje pó wjelikosći grönlandskich městow a městaškow.
Sobotu, 15. julija, jo był Qaqortoq cel našogo drogowanja z wjelikeju łoźu. Ta jo musała wjelikosći dla zasej zwenka pśistawa zakokulona wóstaś. Nas pasažěrow su, ako cesto w tom dowolu, zasej z tenderowymi cołnami do pśistawa móŕskego zalewa pśinjasli. To prědne pak, což smej z muskim zajtša wót balkona kabiny wiźełej, su byli wjelike lodowe góry, plějuce we wóźe. Z wjedrom smej měłej wótnowotki wjeliku gluku: słyńco jo swěśiło, tak až smej měłej wjeliki lušt, sebje městaško a jogo zajmnostki woglědaś. Naju prědny cel jo był zasej muzej. Tam smej dostałej nejlěpšy pśeglěd wó historiji městaška a žywjeńskej wašni tam bydlecych luźi.