Z Barlinja/Berlin. Sobotu wjacor, 11. nowembra, jo barlinske Serbske towaristwo Pawoł Nedo na wósebne, w Barlinju skerjej njewšedne tšojenje – Serbski wječor/wjacor – do alternatiwnego kluba „Fischladen“ pśepšosyło. Gósći su dožywili tam měšańcu filmow, serbskego hip-hopa a amifolk ze serbskimi kórjenjami. Teke serbska kuchnja njejo směła felowaś.

Pózlažka jo barlinski singer/songwriter Jacke Schwarz wjacor z miłym folkowym zukom zachopił. Paul Geigerzähler jo jogo na guslach pśewóźował.

Feministiska hip-hopowa kupka Kolektiw Klanki z Barlinja jo zagóriła publikum ze swójimi hitami ako „Mróčele“, „Bohawka“ a „Družki“. Teke njeznate spiwy ako „Fata Morgana“, jadnučki nimski spiw, jo kupka na toś tom wjacoru pśednjasła. Ako pśidank su zaspiwali gromaźe z publikumom spiw „Wjesele dźensa“. Atmosfera jo była wjelicna!

Pótom jo grała kupka Serbska Reja z Lipska tradicionelne serbske folklorne spiwy – mjazy drugim „Paleńc“, „W jadnej ruce Hanku“ a „Ty sy taka wijkotata“, ku kótarymž su woglědarje rozpalone rejowali. Nanejmjenjej tak derje, ako jo to nabity połny rum dowólił.