Ze Žylowa/Sielow. Licba Serbskich kjarmušow w Dolnej Łužycy pśiběra. To jo wjelgin dobra powěsć. Take serbske swěźenje z reju a zdźěla teke z programom su tam, źož se wóni pśewjedu, wjelgin woblubowane. Teke togodla, dokulaž se tam wjele młodych a staršych žeńskich k tomu wobleka serbsku swěźeńsku drastwu. Južo žedne lěta pśepšosuju w Gołbinje na taku Serbsku kjarmušu. Lětosa su taku wugótowali prědny raz we Hochozy a na nju jo pśichwatało wokoło 90 źowćow a žeńskich w serbskej drastwje! A teke w Dešnje a w Drjenowje su na taki serbski part kjarmušu wóswěśili. Mamy toś naźeju, až bywa takich Serbskich kjarmušow hyšći wěcej w pśiducych lětach.

Nejdlejšu kjarmušowu tradiciju pak matej w Dolnej Łužycy nejskerjej Domowinskej kupce w Chóśebuzu a Žylowje. Nanejmjenjej južo 20 lět dłujko zmakaju se cłonki z wobeju kupkowu k Serbskej kjarmušy – ze serbskim kulturnym programom, z rozgronami za blidami a tak, ako se to słuša na kjarmušy, z gusyneju pjacenju. Kafejownja „Nordstern“ w Žylowje jo za nich pśecej wjelgin dobry gósćowaŕ.