Z Města/Cottbus. Połny program jo měło tych źaseś źiśi, kenž su se wót 23. až do 27. oktobra 2023 wobźělili na ferijowych graśach. Gromaźe z Dolnoserbskeju kulturneju akademiju jo Franciska Albertowa, zagronita Domowiny za młoźinske źěło, z pódpěru Joachima Jureńca, rěcnego motiwatora župy Dolna Łužyca, cełu kopicu zajmnych aktiwitow pśigótowała.

Tak su źiśi woblica do banjow wutšugali, kjarmušny mazańc wupjakli a želej z winowych grankow zawarili. Źiśi pak njejsu jano w kuchni źěłali, ale su teke špacěrowali pó Serbskem běrtylu a pó parkach blisko žurle Dolnoserbskeje kulturneje akademije. Pśi tom su pyšne łopjena, slědne kwiśonkowe łopjenka, dubjańki a druge wěcki zběrali, z kótarymiž su pón kreatiwnje baslili.