Z Budyšyna/Bautzen. Serbski ludowy ansambel (SLA) jo pśedslědny pětk swóju inscenaciju „Dych žiwjenja/Der Hauch des Lebens – Vom Kommen und Gehen“ prědny raz pśedstajił. We wupśedanem zalu SLA w Budyšynje su prezentěrowali wšykne šparty doma nałogi slěpjańskich Serbow, ako maju cyniś z narodom a ze smjerśu. Jo to było muzikowe źiwadłowe graśe z rejami.
Póstarcył jo ten projekt intendant SLA Tomas Kreibich-Nawka. Pó jogo ideji jo napisał Philipp J. Neumann libreto, pśi comž jo jogo póraźiła rěcna motiwatorka Domowiny Juliana Kaulfürstowa. Mimo togo jo Neumann nacerił jawišćowy wobraz a jo wjadł režiju. Gromadu z choreografowku Mia Facchinelli jo wón wuwił jadnotliwe sceny, ako pokazuju pśechadne rituale nastupajucy narod a dupjenje kaž teke wuměranje a zakopowanje. Raz jo to wuglědało realnosći bliske, raz jo se wšo symboliski pśewušyło.