To se wě, až maju teke serbske a łužyske filmy na lětosnem festiwalu swójo kšute městno. Za to se staraju w znatem rěźe „Heimat/Domownja/Domizna“. Něco pak jo pśi tom nowe. W slědnych 20 lětach su take pokazali pśecej pónjeźele wjacor w kinje „Weltspiegel“ w programje „Łužyska filmowa pśeglědka/Lausitzer Filmschau“. Ta pak wěcej njebuźo – za to buźo lětosa nowy program pód motom „Dłujka noc krotkich łužyskich filmow/Lange Nach der kurzen Lausitzer“.
Ta buźo stwórtk, 9. nowembra, we wjelikem zalu „Weltspiegel“, źož ga jo dosć městnow za publikum. Dogromady budu tam pokazaś źaseś filmow w serbskej a nimskej rěcy, a to we dwěma blokoma. Ten prědny se zachopijo zeger 19:00 a ten drugi pón zeger 21:00. Njewótwisna jury buźo wšykne filmy gódnośiś a ten nejlěpšy z nich dostanjo pón Myto Załožby za serbski lud. To budu pśepódaś pón sobotu wjacor pśi oficialnem zakóńcenju festiwala. Kake serbske a łužyske filmy něnto na nas cakaju?
W prědnem bloku, zeger 19:00 su to slědujuce:
„Wót doma/Von Zuhause (Katja Hrjehor, w serbskej rěcy). We filmje zgónijomy, co serbske luźe zgubijo abo dobydnjo, gaž wopušćiju Łužycu.