Ze Smogorjowa/Schmogrow. Wósebny jubilej su mógali Smogorjowarje a Denny Müller, webmaster a dawaŕ idejow boka www.schmogrow.de, dnja 23. septembra 2023 swěśiś. Pśed dokradnje 20 lětami jo šła priwatna strona wó jogo rodnej jsy k startoju a jo se wót togo casa stawnje rosćeceje woblubowanosći zwjaseliła.
Pišomy lěto 2003. Internet jo hyšći skerjej młody medium, kótaryž móžo se akle wót 1993 za priwatne wósoby wužywaś. Pěś lět pózdźej, w lěśe 1998, źo pytańska mašina „Google“ k startoju. Internet buźo nowy medium, kótaryž luźi pó cełem swěśe zwěza. Potencial togo spóznajo pśecej wěcej, wósebnje młode luźe. Jaden z nich jo tencas 21-lětny Denny Müller. Z computerami zagórjony młody muski wugba w toś tom casu južo AOL-bok za computerowe pšašanja. Pśi registrěrowanju toś togo boka póbitujo jomu póbitowaŕ drugu domain. Wón rozsuźijo se spontanje na 23.09.2003 za registrěrowanje Schmogrow.de. Mysle wó wopśimjeśu njejo sebje doněnta hyšći gótował. Ale južo skóro buźo webstrona k swójim ceło wósobinskim stawiznam wuspěcha.