Kupka „Serbska reja“ jo w cełej Łužycy rad witany gósć. Což ned nadpadnjo: Gregor Kliem muzicěrujo ako cłonk kupki na kradu njewšednem instrumenśe. To njejo tradicionelny serbski instrument, ale weto se góźi za serbsku muziku.
Ta nykelharpa („Nyckelharpa“), w Nimskej teke pomjenjona „Schlüsselfidel“, toś klucowe gusle, jo fidlaŕski instrument. Tšuny se mechaniski pśez tasty (kluce) skrotcyju, kaž wě wikipedia. Aby nykelharpa wósebnje rědnje klincała, wužywa gerc stśiłku (Bogen).
Gregor Kliem jo se južo ako student w Lipsku za folklornu muziku zajmował. Togodla rad woglěda festiwalam, kótarež se pśiwobrośiju muzikowem žanroju folk. Pśipadnje jo wón blisko Lipska rucnikaŕku póznał, ako w swójskej źěłaŕni instrumenty twari. Wóna jo se teke zaběrała z historiju nykelharpy a z muzicěrowanim na njej.