Co wopśimjejo nowemberske wudaśe?

Wulicowanje „Wuchacowy klěb – wót wuchaca z Błośańskeje zeleznice?“ jo spisała awtorka Jill-Francis Ketlicojc. To jo zajmne a pówucne wulicowanje, kenž móžośo cytaś w Płomjenju a teke z pomocu QR-coda wótsłuchaś. Powědaŕka jo awtorka sama. Dalšny tema jo barwojtosć lista, ako wurědnijo tuchylu krajinu. Kak k tomu pśiźo, až list tak pisany jo, to zgóniju źiśi w casopisu. Wušej togo cytaśo na pśikład wó historiskem měsće Oxford we Engelskej, wó „Elbenwald“-festiwalu w Chóśebuzu a wó lětosnej „Šuli w zelenem“, kótaruž Rěcny centrum WITAJ kužde lěto pśewjedujo. A, se wě, zwucowanja, comic, gódańka, žorty a dalšne zajmne teksty w Płomjenju teke njefeluju.

Kótary artikel wósebnje dopórucyjośo?

Jadno městno w pólskej jsy Jeziory Wysokie jo na kuždy pad woglědanja gódne a wó tom pišom w Płomjenju. Źo wó centrum za pśirodnu a gólnu pedagogiku, do kótaregož su se serbske familije łoni na drogu dali. Źiśi su tam mjazy drugim wjele wó jeglinowych bomach zgónili a su mógali samo šyšku nejwětšego škrjoka na swěśe do rukowu wześ, což jo wiźeś na fotach.