Z Gołbina/Gulben. Zachopjeńk oktobra su se pórali někotare Gołbinarje a teke gósći do zgromadnego wejsańskego doma w Gołbinje. Šula za dolnoserbsku rěc a kulturu jo póbitowała pśednosk z Danielom Kubikom z temu „Filmy wó Serbach a serbske filmowe twórjenje wót zachopjeńkow až do pśibytnosći.“
Daniel Kubik jo wulicował swójim źaseś pśisłucharjam wó zachopjeńkach filma. Tak daju se dopokazaś prědne filmowe wurězki ze serbskimi temami z lěta 1910. Ceło jasnje mamy dwě družynje serbskich filmow. Dajo filmy wót Serbow za Serbow a filmy wó Serbach.