Ze Šejnejdy/Schönhöhe. Jano 68 wobydlarjow ma rodna wjas dolnoserbskego ceptarja, spisowaśela a ludowego basnikarja Fryca Rochy, a wót septembra lěta 2021 teke wejsański dom (Bürgerbegegnungsstätte) z mjenim „Fryca Rochy“ – k cesći swójogo nejznatšego syna. Wót togo casa su Wejsne zjadnośeństwo Turjej/Šejnejda a wobydlarje wšake swěźenje, zarědowanja a dwě wustajeńcy tam na nogi stajili. Zachadny pětk, 13. oktobra, su wóni we toś tom domje tśeśu wustajeńcu wótwórili, a to z bildkami hobby-fotografowki Kerstin Fetschoweje z Chóśebuza.

Kameru jo měła Kerstin Fetschowa ako 6-lětna prědny raz w ruce. Ale akle w lěśe 2019 jo se swóju prědnu digitalnu kameru kupiła. Až lažko njejo wobchadaś z takim modernym rědom, jo wóna malsnje markowała. Dla togo jo se wudała do šyrokego swěta, do Islandskeje, do Alaski a do kupow Lofoten w Norwegskej, aby z pomocu profijow wuměłstwo fotografěrowanja nawuknuła a se rozestajiła z toś teju digitalneju techniku.