Z Wětošowa/Vetschau. Na dnju wótwórjonego pomnika, 10. septembra, jo se pó tradiciji wótměła serbsko-nimska namša we Wětošowje. Pśichwatało jo jadnab 80 namšaŕkow a namšarjow wót Baršća až do Barlinja, wót Tšupca až do Złego Komorowa a samo z Górneje Łužyce. Zawěsće jo wšaka namšaŕka a wšaki namšaŕ teke był narski na „nowego“ fararja, ako jo měł swóju premjeru we Wětošowje na nimsko-serbskej namšy. Jo to był faraŕ Tobias Pawoł Jachmann z Baršća, ako jo namšu źaržał a prjatkował. Cytała jo serbska lektorka Madlena Norbergowa. Znatecynjenja a organizaciju na městnje jo měł na starosći cłonk Spěchowańskego towaristwa za Wětošojsku cerkwju a teke cłonk Spěchowańskego towaristwa za serbsku rěc w cerkwi Hartmut Bott. A zapšosby jo prědny raz sobu wugótowała serbska hortnaŕka a pśedsedaŕka towaristwa „Tyca“ Anke Gräfowa.