Z Budyšyna/Bautzen. Na zalu Serbskego muzeja w Budyšynje su se njedawno zmakali wucabniki a wótkubłarje ze źiśownjow a šulow, sobuźěłaśerje socialnego a medijowego źěła ako teke wědomnostniki na fachowej konferency pód titelom „Musymy powědaś!“. Głowna tema jo była pśechad wót źiśownje do zakładneje šule. Zarědowarja konference stej byłej Domowina a Serbske šulske towaristwo (SŠT). Jadnaŕ SŠT Andreas Ošika jo gronił, až „Źiśi w pśedšulskem starstwje z wjelikeju napnětosću su – pak se wjasele na zastup do šule kaž teke na to, až su něnto skóńcnje wjelike źiśi.“ Kubłańska referentka Domowiny Katrin Suchec-Dźisławkowa jo wjadła pó konferency a jo zwězowała kopicu pśednoskow a dopóznaśow z workshopow.