Z Gubina/Gubin/Guben. W zachadnych lětach smy my – to towaristwo Euroregion Sprjewja-Nysa Bobr – wjele zajmnych projektow ze Serbami pśewjadli. K takim słuša na pśikład młoźinski projekt mjazy Domowinu a pólskimi skawtami w Domowniskem muzeju w Dešnje, źož su młodostne zgromadnje drogowali, klěb pjakli a wó pólskich a serbskich jatšownych nałogach powědali. Rědny projekt jo był teke wustup domowinskeje kupki z Mósta w gmejnje Nowa Sól. Tam jo swajźbaŕski pśeśěg z Mósta se wobźělił na gmejnskem swěźenju. W pyšnych serbskich drastwach su śěgnuli pó jsy a pótom su na jawišću rejowali. Domowina jo teke cłonk Euroregiona a wobźělijo se na głownej zgromaźinje Euroregiona z głosowańskim pšawom.