Z Chóśebuza/Cottbus. Zachopijo se nazyma, toś bližy se teke ten cas, gaž luźe cesćej doma wóstanu a pytaju za sebje wšake zaběry. Se wě, móžoš jadnu seriju za drugeju glědaś abo knigły cytaś respektiwnje słuchaś. Młoge wót nas ale lubuju teke na wjacorach wšake rucne źěła. Mamy w zymje za to dosć casa a toś te zaběry maju teke wěsty změrowański abo samo meditaciski aspekt. No jo, nanejmjenjej tak dłujko, až njemusyš na pśikład połojcu pulowera rozprojś…

Naše pśedchadniki (abo skerjej pśedchadnice) su se w zymje cesćej gromaźe sednuli a pśi pśěźenju abo pjerjedrěśu spiwali, ale teke se rozgranjali a z wěstosću wuměnili aktualne informacije ze jsy a dalšneje wokoliny, a pśi tom jo teke jadna wót drugeje wuknuła. Pśězu móžoš teke źinsa dožywiś, na pśikład w Hochozy. W Měsće pak take póbitowanje jo w slědnem casu felowało.