Z Dešna/Dissen. Chtož jo se slědnu sobotu abo slědnu njeźelu wudał na wobłuk pód gołym njebjom „Stary lud“ slězy dešańskeje cerkwje, ten jo dožywił casowe drogowanje do wšednego dnja Słowjanow we srjejźowěku. Wójnarje we połnem bronidle, muže, žeńske a źiśi w jadnorej płachtowej abo wałmjanej drastwje – dogromady 45 pśedstajarjow – su pokazali, kak jo to žywjenje pśed tysac lětami nejskerjej wuglědało. Kak jo se z drjewom źěłało, kak su kowali, pśědli abo drastwu barwili – to a wěcej jo se prezentěrowało a raźi su te pśedstajarje na pšašanje gósći wótegronili. Torsten Neuer z Hamburga na pśikład pśiźo južo wót wjele lět na wobłuk „Stary lud“ a tam pokazujo zgótowanje pyšnotkow. Te gótowe pyšnotki wuglědaju tak ako archeologiske namakanki abo su wót nich inspirěrowane, rozkłaźo Dorothea Liepoldowa, pśewóźowaŕka Torstena Neuera z Póruhrskeje, ako jo prědny raz how pódla była. Wacej su pśišli pśedstajarje mimo z drugich regionow Nimskeje teke z Českeje, Pólskeje, Litawskeje, jaden samo z USA.