Z Rubyna/Ruben. Na jsach wokoło Rubyna tuchylu se swěśi skóro wšuźi kokot. Rubynarje teke swěśe zabijanje kokota, ale jano kužde druge lěto. Dla togo jo lětosa było cas, 30lětne wobstaśe Domowinskeje kupki wobšyrnje swěśiś, a to sobotu, 16. septembra.
Z lubosću su rubyńske Domowinarje – jadnab 50 cłonkow! – swěźeńske stany a swěźenišćo ze serbskimi barwami, wimpelami a fonami wupyšnili. Aby aktiwity Domowinskeje kupki pśedstajili, su wóni samo mały majski bom stajili. Žnjowny wěnc jo był wiźeś z kokotom, a dokulaž w Rubynje žaby njekaraju, jo na karje „wumarły muski“ (jaden totalnje pijany muski) městno zabrał.