Z Brězowki/Halbendorf. Naš cytaŕ Wolfgang Kotisek z Brězowki njejo jano znaty ako fidlaŕ a spiwaŕ w Slěpjańskem serbskem folklornem ansamblu, ale wón teke wjelgin lubujo tu pśirodu. Cesto jo ducy teke ze swójim fotoaparatom, aby wótmólował struski, rostliny, krajinu a teke wšake zwěrjeta. Pśed krotkim jo do redakcije Casnika pósłał foto z jadnym insektom, kótaryž móžomy jano rědko wiźeś. Jomu se groni na nimski „Gottesanbeterin“, serbske mě pak njeznajomy. Teke profesor Muka njejo to słowo do swójogo tłustego słownika pśiwzeł, dokulaž w jogo casu toś ten wósebny insekt pśi nas zewšym znaty był njejo. Njejo how žywy był.

Jogo domownja su strony kołowokoło Srjejźnego mórja, tam, źož jo bejnje śopło. Pśez to pak, až jo se klima pśeměnił a teke w našych stronach temperatury stupaju, jo se toś ten insekt teke dostał k nam. Wót lěta 2007 su jen teke namakali w Bramborskej a we Łužycy, a how wósebnje tam, źož su byli raz wuglowe jamy. W Luboraskej góli su jen prědny raz 2017 „wuslěźili“.