Ze Slěpego/Schleife. Pśed dwěma tyźenjoma stej źewjety a źasety lětnik Wušeje šule Slěpe pśewjadłej projektowy a wandrowański źeń. Rědownja 9a jo se rozsuźiła za woglěd w pólskem geoparkowem centrumje „Stara blidaŕnja“ w měsće Łęknica.

Tam jo se rědownja źěliła do dweju kupkowu: Jadna jo se zaběrała we keramikowej źěłaŕni, źož stej Agnieszka Janowska a Paulina Skraba, „góspozy“ teje „Stareje blidaŕnje“, jich rozpokazałej w baslenju. Druga kupka jo se informěrowała we wustajeńskem centrumje wó stawiznach Mužakojskego wokłona (Muskauer Faltenbogen) a jo rownocasnje mógała se woglědaś aktualnu wósebnu wustajeńcu „Zelene raje“ – >Historiske zagrody we Łužycy<. Tam su młodostne zmakali Detlefa Nickela wót nimskego spěchowańskego towaristwa „Geopark Mužakojski wokłon“ („Geopark Muskauer Faltenbogen“), kenž jo jich pón wjadł. „Slěpe lažy w Geoparku, gromadne źěło teje šule z ETVZ GmbH jo dobre“, groni Detlef Nickel. (EVTZ jo skrotconka za: „Europäischer Verbund für territoriale Zusammenarbeit mit beschränkter Haftung ,Deutsch-polnischer Geopark Muskauer Faltenbogen‘“.)