Z Mósta/Heinersbrück. Dnja 6. septembra jo to było tak daloko a smy mógali naše źiśi z jich starjejšymi a starymi starjejšymi na Serbskem familijowem dnju pówitaś! Dypkownje zeger 15:00 smy startowali na terenje pśi wognjowej woborje a wěcejzaměrowej hali w Mósće. Wšykne wótkubłaŕki, jadnotliwe maśerje a źowća su w serbskej drastwje chójźili.
Swětosnje wupyšnjone stojnice wót chóśebuskego Rěcnego centruma WITAJ su pšosyli na puzzlowanje, gódanje, mólowanje, se wě na wuknjenje a dožywjenje serbskeje rěcy. W jadnej stojnicy jo se póbitowała serbska literatura.
Malsnje su naše źiśi kuždego starstwa tam chwatali a wšykno wuproběrowali. Z wjelikeju angažowanosću jo Witaj-team z Chóśebuza jich pśi tom pódpěrował, póbuźił a pśewóźił. Comy se wutšobnje wuźěkowaś fachowemu personaloju z Chóśebuza, pśedewšym Kathrin Lehmannojc a Aleksandroju Draguli, ako stej južo pśi pśigótowanju aktiwnje sobu statkowałej!
Někotare starjejše su za naš tykańcowy bufet pilnje pjakli a Martin Grunewald wót janšojskego konsuma jo se starał wó piśa. Cele luby źěk!