Z Drjenowa/Drehnow. Drjenojska młoźina jo 9. septembra kokot swěśiła. Na śopłem kóńcu tyźenja jo pěś rejtarjow wó titel krala 2023 wójowało a jadnasćo źowćow w serbskich drastwach wó titel kralowki.

Młoźina jo z pśeśěgom pśez wjas startowała. Prězy su tśo carne muske gnali. Wóni su zagronite za wrota a kokot, nose pśecej carny frak a kurje blobawu. Na městnje su se gólcy z kónjami wót Jerolojc rejtaŕnje zarejtowali a źowća su se na jawišću zgromaźili. Jo wěcej ako jadnu góźinu trało, až do togo, až jo prědny rejtaŕ głowu kokota wótrył.

Ale pśed tym jo se žnjowny swěźeń pśetergnuł. Wěcej ako 100 luźi z mopedami jo na droze pódla wrotow jěło, aby se do Turjeja do „Simson Treffen der Tauerochsen“ pórało.