Z Depska/Döbbrick. Lětosny Kokot jo organizěrowała wejsańska młoźina z pśedsedaŕstwom – Henry Scheppan, Franziska Weichertojc, Josephin Reinschkojc a Marvin Reinschke. Ten źeń jo było wjelicne wjedro, słyńco jo paliło z 30 stopnjami. Jo dało sedymjo rejtarjow, kónje stej Wehlanojc rejtaŕnja a burski dwór z Běłeje Góry k dispoziciji stajiłej. 15 žeńskich jo se woblekało bursku drastwu a sedymjo drožkarjow jo pśišło na kutšach wót Siegmund Kleo ze Žylowa.
Pótom jo było muzikowe wótpołdnjo a wjacor z live-kupku NaUnd. Kapałka z Noweje Jsy jo se zapózdźiła a dla togo jo se wumaršěrowanje zachopiło akle wokoło zeger 14:30 wót ewangelskeje cerkwje za stareju šulu.
Wó tykańc a jěšnicku jo se starała depšćańska młoźina wob cas kokota, chłodne piśa jo športaŕski dom pśedał. Pód wrotami, pśed wócyma prědnego krala su źowća Annemarju-polku rejowali.