Z Lüchowa/Z Lübelna/Lüchow/Lübeln. Což su cłonki towaristwow Wendischer Arbeits- und Freundeskreis e.V., Rundlingsverein e.V., rejowańska a drastwowa kupka De Öwerpetters e.V. a Rundlingsmuseum Lübeln z Wendlanda a ako gósći z Łužyce Spěchowańske towaristwo za serbsku rěc w cerkwi, spiwaŕ Bernd Pittkunings, kupka Serbska reja, źiwadłowa kupka towaristwa „Bratrowstwo“ župy Domowiny „Handrij Zejler“ Wórjejce a dalšne wobźělniki wót 1. do 3. septembra pśi nejrědnjejšem lěśojskem wjedrje w Lüchowje a Lübelnje zgromadnje prezentěrowali, jo było mimo cwiblowanja nejwětšy swěźeń zajźonych lětźasetkow, kenž jo se pósćił kulturje połobsko-słowjańskich Drjewjanarjow Wendlanda. Jim wšyknym słuša wjeliki źěk. Wabjeca pisanosć programa jo wupominała wjele casa a procowanjow: reje, spiwy, źiwadło, nałogi, pśednoski, info-stojnice – ako teke kulinariske zastaranje na swěźenišću.