W zajźonych lětach su redaktory a redaktorki našogo tyźenika pśecej zasej pisali reportaže a rozpšawy wó swójich drogowanjach a wulětach – do bliskeje domownje rowno tak ako do cuzby. Teke serbske luźe droguju pó swěśe, wótwórjaju sebje ceły swět a gaž drugim wó tom rozpšawiju, rozšyrjujo to teke nam cytarjam a drugim horicont.
Źinsa zachopijomy z krotkeju noweju seriju. Marion Stenselowa z Běłeje Góry pišo wó dožywjenjach ducy do Grönlandskeje.
Městaško Kirkwall
na Orkney-kupach
Tśi lěta som musała na naju jězbu do Grönlandskeje cakaś. Korony dla jo drogowański běrow w zajźonyma lětoma jězbu kuždy raz wótgronił. Ale lětosa jo tak daloko było a som z manźelskim njeźelu drugego julija stupiła na wjeliku pasažěrsku łoź z mjenim „Poezija“. Na balkonje kabiny stojecej smej se rozžognowałej z krajom za tśi tyźenje, ako jo łoź pśistaw Warnemünde spušćiła. Pśi tom wiźe pasažěry na lěwem boku 4-mejtari wusoku złośanu figuru Esperanza, což jo pśestajone „naźeja“.