Z nimskim nadpadom na Pólsku jo zachopił se pśed 84 lětami Druga swětowa wójna. Wójarski puś w Chile pśed 50 lětami jo wše naźeje na demokratiju zadorał. „9 / 11“ pokazujo pśed 22 lětami nowu dimensiju terora. Daty a dopomnjeśa, kenž daju se śěžko znjasć! Brutalnje pokazuju, co luźe w ideologiskej zaslěpjonosći drugim napóraju. Njewěmy ga to lěpjej?

Gótujśo ze mnu wjeliki myslowy skok. Dowol w kupjelnišću. „Kupańska krajina“, w kótarejž wjele basenkow pśepšosujo, až duša se ak w raju cujo. Śěžko brašna žeńska źo ze swójim rolatorom, pśewóźowana a pódpěrowana wót swójogo muskego, kšac pó kšacu na basenk. Ceło pómałem a z wjele procu źo pó schódach dołoj. Zacute pěś minutow trajo ten puś, kenž druge w někotarych sekundach chójźe. Skóńcnje jo we wóźe, źož se naraz cujo njebrašona. Pómałem, rowno ako „strowa“ chapja plěwaś. Wobglědowanje jo za mnjo dłymoke zmakanje z bibliskim wulicowanim. Teke mój woglěd na nejwšakorakšych žrědłach dopomina mě na słowa biblije.

Derje, wšykne, kenž sćo łacne, pśiźo do wódy! Profet Jesaja dajo Bóže pśepšosenje dalej (55, 1).