Ze Złego Komorowa/Senftenberg. Njeźelu, 27. awgusta, jo pśišło wušej 60 namšaŕkow a namšarjow, aby swěśili 14. serbsko-nimsku a zrownju 3. ekumenisku, to groni ewangelsko-katolsku namšu w bergaŕskem domje městaška, w Serbskej cerkwi. Ginter Pawliš, iniciator namšow, jo wšyknych zbliska a zdaloka wuwitał. Wósadny faraŕ Manfred Schwarz jo spiwał liturgiju serbski a faraŕ na wuměńku, Dieter Schütt sen., kenž jo wóswěśił lětosa swój 85. narodny źeń, jo do wutšoby prjatkował serbski a nimski wó pšašanju, chto jo kśesćijan abo kśesćijanka, jolic wzejomy ako měritko bibliske słowa pósoła Pawoła w lisće na Romarjow: Njeźaržćo sami se za mudrych. Njezapłaśćo nikomu złosć za złosć. Starajśo se we to, což pócne jo pśed wšyknymi cłowjekami. Joli móžno, tak wjele ako na was jo, ga mějśo ze wšyknymi cłowjekami měr. Njepómsććo sami se, móje lube, ale dajśo město tomu gniwu Bóžemu, pśeto pisane stoj: to pomsćenje jo mójo, ja cu zapłaśiś, źejo ten Kněz. Gaž togodla twój winik jo głodny, ga naseś jogo; joli wón łacny, ga napowaj jogo; pśeto gaž ty to cyniš, buźoš ty hognjece hugle na jogo głowu žariś.