Ze Slěpego/Schleife. Južo lěta dłujko pominaju wobydlarje ze jsow Grodkojskego pódzajtšnego krejza wěste wózenje źiśi do slěpjańskeje šule. Pśed tśi lětami jo se toś ta nastupnosć w ramiku wobydlaŕskego napšašowanja Łužyskej runźe (Lausitzrunde) pśednjasła. Tencas jo se pšašało: Co wótcakajośo pó wótstupu wót wugla? Brunicowy wótstup drje hyšći njejo how, ale weto su kšuśe pominali busowe zwiski wót Grodkojskich měsćańskich źělow pódzajtšnego krejza do slěpjańskeje šule zarědowaś. Tudejše wobchadowe firmy su wót realizacije toś togo pśedewześa bóžko hyšći daloko pśec.

Něnto jo se pak druge rozwězanje pokazało. Wót Lěska do Slěpego buźo se twariś kólasowaŕska droga. Droga mjazy jsoma njejo wěsta šulska droga za źiśi pó kólasu ducy, a teke nic za kólasowaŕske drogowarje, kenž su ducy wót Slěpego do Bramborskeje abo nawopak.