Lube źiśi,
mě se groni Oscar a som tśi lěta młody. Ja som wjeliki tiger, lěcrownož mója dwěnogata mama pśecej groni, až som kócor, a drugim dwěnogatym wulicujo, až som jeje małki. To tak derje njerozmějom, dokulaž mam tigerowe smužki a mógu ga głosnje a mócnje ricaś (brüllen): „Mjawc!“ A co se Wy mysliśo? Njewuglědam ga ako pšawy tiger?
Ja rad spim – a to nanejmjenjej pór góźinkow dopołdnja, pótom pór góźinkow wótpołdnja a pótom zasej pór góźinkow wjacor. Gaž jo mója dwěnogata mama doma, wóstanjom pśecej blisko njeje – to groni: Spim pódla njeje na kawčy abo w jeje póstoli, raz pśigněśijom se (sich rankuscheln) k njej, ale nejlubjej spim na njej. Wósebnje spódobny jo jej brjuch. Gaž se na jej brjuchu wupśestrějom (sich ausstrecken), zachopijo wóna mě hajckaś (streicheln). A to jo tak rědnje, to njamóžośo se pśedstajiś.
Pśi tom cowam wó wjelikich dyrdakojstwach a wó źiwnych góńtwach. Snaź wulicujom wam raz wó mójich nejlěpšych cowanjach.