Z Smogorjowa/Schmogrow. Napśeśiwo swójim „kolegam“ na drugich jsach, kótarež wó žywjenju tśěskocu, ma kokot we Smogorjowje pšawje gluku. Wón caka w kórbiku až do togo, až jogo pušćaju a pón zasej pópadnu.

Smogorjojska młoźina jo se zajźonu sobotu pśed swěźeńskim jawišćom pódla športnišća zmakała. Pśed zachopjeńkom zabijanja kokota jo młoźina nejžpjerwjej pó jsy śěgnuła. Z nagronom stej Anja Konzackojc a Tom Siegert žnjowny swěźeń wótwóriłej, a pśi tom jo Tom Siegert serbski part pśewzeł. Nagromadu jo źewjeś gólcow wó titel žnjownego krala wójowało a šesć źowćow we swěźeńskej drastwje jo jich pógóniło.