Z Běłeje Góry/Byhleguhre. Wejsna zgromadnosć Běła Góra jo tradicionelnje pśi sćernišću zasej swój kokot swěśiła. Slědnu sobotu jo nastupiło 13 rejtarjow a jadna rejtaŕka k tomu. Južo dny do togo su se wšykne wobźělone zmakali, aby zgromadnje wěnce a wrota wili. Za rejtarjow jo było jasnje rědowane, kuždy jo śěgnuł numer, gdy jo na rěźe. Pódobnje ako teke w Bórkowach dejał kuždy rejtaŕ teke žeńsku w swěźeńskej drastwje sobu pśinjasć. Pla manźelskich rejtarjow to njejo tak derje funkcioněrowało, togodla njejo tam samska licba žeńskich ako rejtarjow była. Nejpjerwjej su rejtowali wóženjone, how jo Christian Bramer dojśpił prědne městno. Pón jo slědował na drugem městnje Stefan Wagenknecht ze swójeju źowku Sophie Heinrichojc. Tśeśe městno jo „Jan“ z Kózlego Tobias Richter dojśpił, jogo kralowka jo była Joki Rudolphojc. Dla wjasela tśeśego městna jo Tobias Richter slězy wrotow bóžko wót swójogo kónja padnuł!